the leid

it's no inferior

it's no derived

it's no bad inglis

it's no the speak o
fowk at canna lair
inglis richt

it's no the wye at
celtic fowk spikk inglis

it's a leid o its ain,
comin doon tae wis
fae an unbreukin line

aa the wye fae the northren
anglo saxon langage

whaur it haes 'ch'
fur inglis 'gh', or than

's' fur 'sh', or than
'sk' fur 'sh', or than

'aa' or 'aw' fur 'al'
or than 'ck' or 'k' fur 'ch'

it's acause it's a gey auld
wye o spikkin, no acause

the richtness o inglis
wes tyned abuin the mairches

an a wee saicret - naethin's
richt whan it comes tae
leids